Нэр дэвших эрхээсээ татгалзаад байсан АН-ын нэр бүхий гишүүд шийдвэрээ өөрчлөн, сонгуульд оролцохоор болжээ.

Тухайлбал, АН-ын дэд дарга Ц.Жадамбаа өөрийн цахим хуудсаар дамжуулан сонгуульд нэр дэвшүүлэхээр өгсөн өргөдлөө татан авч байна гэх мэдэгдлийг хийсэн бол АН-ын жагсаалтын 33-т бичигдээд байсан тус намын Улс төрийн зөвлөлийн гишүүн М.Чимэддорж мөн нэрээ татах хүсэлтийг хүргүүлээд байсан.

Тэгвэл АН-ын дарга Л.Гантөмөр сонгуулийн үр дүн буюу намынхаа том эрх ашгийн төлөө дээрх гишүүдтэйгээ уулзан нэр дэвших эрхийг нь баталгаажуулжээ. Улмаар ТҮЦ машины гэх тодотголтой АН-ын дэд дарга Цагаан-Өвгөний Жадамбаа УИХ-ын сонгуулийн 8-р тойрог буюу Баянзүрх дүүрэгт нэр дэвших эрхээ намаасаа баталгаажуулж авсан байна.

Мөн АН-ын Улс төрийн зөвлөлийн гишүүн М.Чимэддорж сонгуульд оролцон, жагсаалтаар нэр дэвших болжээ.