Монгол Улсын Хөдөлмөрийн баатар, Олимпын аварга Н.Түвшинбаярыг улсын начин Э.Энхбатын биед хүнд гэмтэл учруулсан гэх үндэслэлээр яллагдагчаар татан, шалгаж байгаа.
Түүнийг өнгөрөгч дөрөвдүгээр сард ШШГЕГ-ын харьяа Цагдан хорих 461 дүгээр ангид 30 хоног цагдан хорьж, тавдугаар сарын 20-ны өдөр өмгөөлөгчийнх нь хүсэлтийн дагуу батлан даалтад гаргаж, гадуур байцаалт авч байсан юм.
Түүний хэргийг Хан-Уул дүүрэг дэх цагдаагийн нэгдүгээр хэлтэст шалгаж дуусаад дүүргийн прокурорт шилжүүлсэн байдаг. Гэвч хохирогчийн хууль ёсны төлөөлөгч, улсын начин Э.Энхбатын эхнэр Б.Нандинцэцэг Нийслэлийн прокурорын газарт гомдол гаргасан. Улмаар прокуророос хохирогч талын гомдолд дурдсан асуудлуудыг шалгах чиглэл өгч Мөрдөн байцаах албанд шилжүүлж, дахин шалгаж эхэлсэн юм.
Тэгвэл өнгөрөгч есдүгээр сарын сүүлчээр хэргийн шалгалтын ажиллагаа дуусаж, Мөрдөн байцаах албанаас Н.Түвшинбаярт Монгол Улсын Эрүүгийн хуулийн 11.1.1 буюу бусдын биед санаатайгаар хүнд гэмтэл учруулсан гэх үндэслэлээр яллах дүгнэлт үйлдүүлэх саналтайгаар прокурорт шилжүүлсэн байна.
Одоогоор хэргийг прокуророос хянаж байгаа ба ирэх сард харьяа дүүргийн шүүхэд шилжүүлэхээр болжээ.
Дээрх хэргийн хохирогч болох Э.Энхбат нь хагас жил орчим хугацаанд ухаангүй, хэвтрийн байдалтай байгаа бөгөөд тэрбээр БНСУ-д эмнэлэгт хэвтэн эмчлүүлж байгаа юм.
| Н.Түвшинбаярын хэргийг прокурорт шилжүүлжээ |
|
