Монголын зохиолчдын эвлэлийн 17 дугаар их чуулганаар Яруу найрагч Б.Ичинхорлоо удирдах зөвлөлийн даргаараа томилжээ.

 

Тэрбээр энэ талаар өрийн цахим хуудаснаа, "Сайхан өдрийн мэнд хүргэе. Өчигдөр болсон Монголын Зохиолчдын Эвлэлийн 17 дугаар их чуулганд монголын зохиолчдын эвлэлийн гишүүд, орон нутгийн салбар хорооны гишүүд мандатын эрхтэй 268 төлөөлөгч чуулж, удирдах зөвлөлийн гишүүдээ сонголоо. Удирдах зөвлөлийн даргын сунгаанд миний бие мөрийн хөтөлбөрөө танилцуулан, үнэмлэхүй олонхийн саналаар ирэх дөрвөн жилд их айлыг удирдах үүрэг хүлээлээ. Их хуралдаа зорин ирж, их утга зохиолын ирээдүйн төлөө сэтгэл тавьж, бодлоо чилээж, саналаа хэлж, дэмжиж, шүүмжилж, шинэ санаачлага, мөрийн хөтөлбөрөө танилцуулсан Эрхэм нөхөддөө баярлалаа. Та бүхний онгод билиг дүүрэн, уран бүтээл арвин, амьдрал нь аз жаргалтай, дэлгэр сайхан байх болтугай. Хичээж ажиллана аа" гэжээ.