Улсын начин Э.Энхбат эх орондоо ирсэн бөгөөд Сонгдо эмнэлэгт эмчлүүлж байгаа гэх мэдээллийг эх сурвалж өглөө. 

 

Сануулахад, Олимпийн аварга, МҮОХ-ны дарга Н.Түвшинбаяр өөрийн найз болох Улсын начин Э.Энхбатыг зодож, биенд нь хүнд гэмтэл учруулсан. Үүнээс үүдэн Э.Энхбат начин тархиндаа хүнд гэмтэл авч, ГССҮТ-ийн Эрчимт эмчилгээний тасагт олон хоног ухаангүй хэвтэн эмчлүүлж байгаад БНСУ-ыг зорьсон юм. 

 

Гэвч өнгөрсөн найман сарын хугацаанд түүний биеийн байдал нь дээрдээгүй учраас эх оронд нь авч ирэх шийдвэрийг гаргасан байна. Начин өнгөрсөн амралтын өдөр гэр бүлийн хамт БНСУ-аас ирсэн бөгөөд шууд Сонгдо эмнэлэгт хэвтэж, эмчилгээгээ үргэлжлүүлэхээр болжээ. 

 

Тэгвэл Монгол Улсын начин Э.Энхбатыг зодсон Хөдөлмөрийн баатар, гавьяат тамирчин Н.Түвшинбаярын шүүх хурлын тов гараад байна. Тодруулбал, Хан-Уул дүүргийн эрүүгийн хэргийн анхан шатны шүүхэд 2021.12.23-ны өдөр Н.Түвшинбаярын урьдчилсан шүүх хурал товлогдоод байна. Уг шүүх хурлаар хэргийг мөрдөн байцаалтад буцаах эсвэл Н.Түвшинбаярын гэм буруутай эсэхийг шийдвэрлэх гэм буруугийн шүүх хурлыг товлох юм. Яллагдагч Н.Түвшинбаярт Эрүүгийн хуулийн 11.1.2.1-д зааснаар яллах дүгнэлт үйлдээд байгаа. Уг зүйл ангиар хэрвээ шүүхээс Н.Түвшинбаярыг гэм буруутай гэж үзэн ял оноох бол таван жилээс арван хоёр жил хүртэл хугацаагаар хорих ял шийтгэх юм.