Шүгэл үлээгчийн эрх зүйн байдлын тухай хуулийн төслийг УИХ-ын чуулганаар хэлэлцэв. Монгол Улсад шүгэл үлээгчийг хамгаалах эрх зүйн орчин дутмаг нь үнэн. гэсэн ч хууль батлахад тооцоо судалгааг орхигдуулж болохгүй. Тухайлбал тус хуулийн төслийн хүрээнд хэд хэдэн анхаарал татах асуудал ажиглагдаж байв.

Нэгдүгээрт, “Шүгээл үлээгчийг 100 мянгаас 1.5 тэрбум төгрөгөөр шагнаж урамшуулна” гэх заалт. Энэ талаар УИХ-ын гишүүд ч байр сууриа илэрхийлж байсан. Урамшуулал авна гэх нэрийдлээр бусдыг гүтгэх, матах нөхцөл байдал үүсэх вий гэж. Нэг үгээр шүгэл үлээгч, матаач хоёрыг ялгах зааг хязгаар тодорхой бус байв.

Хоёрдугаарт, Төрийн нууц ихсэж, хувь хүний нууц багассан энэ үед “НУУЦ” гэх баримт мэдээлэл нь өөрөө харьцангуй ойлголт болчихсон. Өөрөөр хэлбэл нууц биш байх ёстой зүйлийг улсын нууцын зэрэглэлд оруулчихсан тохиолдол цөөнгүй. Үүнийг өөрчлөхгүйгээр авлигын индекс буурч, тус хууль хөрсөнд буух нь юу л бол.

Гуравдугаарт, Шүгэл үлээгчдийн мэдээллийг хүлээж авах шат шатны байгууллагууд шударга байж чадах уу. Хэргийг дардаг, хэрэгсэхгүй болгодог, мушгин гуйвуулдаг хүмүүс сүлжээ үүсгэчихсэн байгаа нь ч нууц биш. Бугшсан идээг нь гаргахгүйгээр наагуур нь цэвэрлээд нэмэргүй .

Иймд халтуурдсан хууль хөрсөнд буухаараа балчирддаг тул сайжруулах хэрэгцээ байгааг хууль боловсруулагчид анхаарах хэрэгтэй.