Зэвсэгт хүчний 326 дугаар ангийн  салаан дарга, дэслэгч Г энэ сарын 28-ны орой тус ангид алба хааж байсан байлдагчийг зодож хүнд гэмтээсэн. Түүнийг байлдагчийн биеийн байдал хүнд Төрийн тусгай албан хаагчдын нэгдсэн эмнэлэгт хэвтэн эмчлүүлж байсан ч харамсалтайгаар нас барсан тухай мэдээллийг хүргэсэн. Тэгвэл талийгаачийн эмчилгээний явц, биеийн байдал ямар байсан талаар ТТАХНЭ-ийн мэргэжилтэн О.Хандмаагаас тодруулга авлаа. 

Тэрбээр "Цэргийн албан хаагч манай эмнэлэгт энэ сарын 29-ний шөнө маш хүнд биеийн байдалтай, ухаангүй ирсэн. Манай эмнэлэгт  цус харвалт, тархины ком, төвийн гаралтай амьсгал, зүрх судасны системийн хурц дутагдал, уушгины хатгалгаатай байж байгаад энэ 30-ны 23.15 цагт нас барсан. Эмнэлэгт ирээд нэг хоног 22 цаг болоод нас барсан" гэлээ.-Талийгаач эмнэлэгт ирэхдээ гаднаа ил харагдах шарх, гэмтэлтэй байсан уу?

-Уруул нь сэтэрсэн байсан.Хэл хазагдсан байдалтай ирсэн. Энэ нь цус залгигдсан гэсэн үг.

-Зөвхөн эмийн эмчилгээ хийлгэж байгаад нас барсан гэж ойлгож болох уу?

-Цэрэг ухаангүй, хүнд  ирсэн  учраас мэс засалд оруулах боломжгүй, хагалгааны ширээн дээр нас барах магадлал өндөр байсан. Эмийн эмчилгээ хийлгэж байгаад нас барсан.