Хөвсгөл аймгийн Тосонцэнгэл сумын Тээл багийн “Тэгш булан” гэдэг газар 10 хүн “Сэлэнгэ мөрөн”-ийг завиар гатлах явцад завь нь хөмөрч 7 хүн голын усанд осолдсон тухай мэдээллийг хүргэсэн. 

 

Дуудлага мэдээллийн дагуу  өчигдөр аймгийн Онцгой байдлын газрын Эрэн хайх, аврах салбар, Орхон аймгийн Онцгой байдлын газрын Эрэн хайх, аврах салбар, Булган аймгийн Онцгой байдлын газрын Эрэн хайх, аврах салбар, Цагдаагийн газар, Шүүхийн шинжилгээний албаны алба хаагчид, тус сумын Засаг даргын Тамгын газар, Эрүүл мэндийн төв, Рашаант сумын Засаг даргын Тамгын газар, Их-Уул сумын Засаг даргын Тамгын газар, Эрүүл мэндийн төвийн ажилтнууд, орон нутгийн иргэд, ар гэрийн хүмүүс гурван бүлэг хуваагдан эрэн хайх ажиллагааг зохион байгуулж, гурван иргэний цогцсыг олсон.

 

Улмаар үзэгдэх орчин хязгаарлагдмал болсон тул эрэн хайх ажиллагааг мөн өчигдөр 21:00 цагт түр зогсоосон бөгөөд өнөөдөр өглөөний  06:00 цагт эрэн хайх ажиллагааг эхлүүлсэн байна. 

 

Осол болсон газар усны түвшин их, үерлэсэн, өргөн нь 133 метр, гүн нь 2-3.5 метртэй байна. Тус аймгийн Рашаант сумын Тээл багийн “Цацын-Ам” гэдэг газар хээрийн штабыг байгуулжээ.