Хөвсгөл аймгийн Цэцэрлэгт суманд коронавирусийн халдварын тохиолдол батлагдсантай холбоотойгоор ойрын болон дам хавьтлууд, төрийн албан хаагчдыг PCR шинжилгээнд хамруулж эхэлсэн. Сүүлийн 24 цагийн хугацаанд тус аймагт нийт 375 хүнд коронавирусийн халдвар илрүүлэх PCR шинжилгээг хийсэн. Ингэхэд Мөрөн болон бусад сумаас тандалтын зорилгоор 317 иргэнээс авсан сорьцод эерэг тохиолдол бүртгэгдээгүй байна. Харин Цэцэрлэг сумын 58 иргэнээс PCR шинжилгээ авахад гурван хүнээс коронавирусийн халдвар илэрсэн байна. Ингэснээр Хөвсгөл аймагт коронавирусийн батлагдсан тохиолдол 10 болсон юм. Тиймээс аймгийн Засаг дарга захирамж гаргаж 9 хоногийн хөл хорио тогтоож, аж ахуй нэгж байгууллагуудын үйл ажиллагааг энэ сарын 29-ны 06:00 хүртэл хязгаарлажээ. Аймгийн Эрүүл мэндийн газар болон Зоонозын өвчин судлалын төвийн хамтарсан баг ажиллаж Цэцэрлэг суманд тандалтын үйл ажиллагааг явуулж ойрын болон дам хавьтлыг тогтоож бүрэн хяналтад авсан байна. Батлагдсан тохиолдлуудын хавьтлын судалгаа үргэлжлэн хийж байна.
0 0

Хөвсгөл аймагт 9 хоногийн хөл хорио тогтоолоо